Isa 59 | NdeIBE | STEP | Ngeqiniso ingalo kaJehova kayimfitshane ukuba isindise, lendlebe yakhe kayibuthundu ukuba izwe.

Isaiah 59

Isono, Ukuvuma Lokuhlengwa

1 Ngeqiniso ingalo kaJehova kayimfitshane ukuba isindise, lendlebe yakhe kayibuthundu ukuba izwe.

2 Kodwa ububi benu sebulahlukanise loNkulunkulu wenu; lezono zenu sezisithe ubuso bakhe kini ukuze angezwa.

3 Ngoba izandla zenu zingcolisiwe ngegazi, leminwe yenu ingcoliswe yibubi. Izindebe zenu zikhulume amanga lolimi lwenu luhlebeza izinto ezimbi.

4 Kakho odinga ukwahlulela okuhle, kakho okhuluma ecaleni lakhe ngobuqotho. Bathembe ukuphika ngeze bekhuluma amanga; bemula uhlupho, bazale ububi.

5 Bachamusela amaqanda ezinyoka, beluke ubulembu besayobe. Langabe ngubani odla amaqanda azo uzakufa, njalo uma elinye lawo lichanyuselwe kuphuma ibululu.

6 Ubulembu babo kabusizi ekugqokeni; abangeke bazimboze ngabakwenzayo. Izenzo zabo yizenzo ezimbi, izenzo zodlakela zisezandleni zabo.

7 Izinyawo zabo zigijimela igazi elimsulwa. Bayaphangisa ukuchitha igazi elimsulwa. Imicabango yabo yimicabango emibi; ukuchitha lokubhubhisa kubonakalisa izindlela zabo.

8 Indlela yokuthula kabayazi; akukho kulunga ezindleleni zabo. Sebenze zaba yimigwaqo ezombelezayo, kakho ohamba ngazo ozakwazi ukuthula.

9 Ngakho-ke ukwahlulela okuhle kukhatshana lathi, lokulunga akufiki kithi. Sidinga ukukhanya, kodwa kulomnyama kuphela; sidinga ukucazimula, kodwa sihamba emathunzini amnyama.

10 Njengeziphofu siphumputha silandela umduli, siphumputhe indlela yethu njengabantu abangelamehlo. Sikhubeka emini ingathi kukusihlwa; kwabalamandla, sinjengabafileyo.

11 Sonke siyahwabha njengamabhere, sibubule ngosizi njengamajuba. Sidinga ukwahlulela okuhle, kodwa kasikutholi; sidinga ukuhlengwa, kodwa kukhatshana.

12 Ngoba ukona kwethu kuwe kunengi, lezono zethu zifakaza okubi ngathi. Ukona kwethu kuhlezi kulathi; siyabuvuma ububi bethu,

13 ukuhlamuka lokungathembeki kuJehova, ukufulathela uNkulunkulu wethu, ukukhuthaza incindezelo lomvukela, ukukhuluma amanga esiwacabange ngezinhliziyo zethu.

14 Ngakho ukwahlulela okuhle kufuqelwa emuva, ukulunga kume khatshana; iqiniso likhubekile ezindleleni, ubuqotho bungeke bungene.

15 Iqiniso kalitholwa ndawo; oxwaya ububi uyahlaselwa. UJehova wakhangela wadaniswa yikungabi khona kokwahlulela okuhle.

16 Wabona ukuthi kwakungelamuntu, wanengwa yikuthi kakho owayengalamula; ngakho waletha ukukhululwa ngamandla akhe, ukulunga kwakhe kwamqinisa.

17 Wagqoka ukulunga njengesivikelo sakhe sasesifubeni, lengowane yensindiso ekhanda lakhe; wagqoka izambatho zokuphindisela njalo wazigoqela ngokutshiseka njengokuzigoqela ngengubo.

18 Uzaphindisela ulaka ezitheni zakhe, kusiya ngalokho abakwenzileyo; lokujeziswa kwabamelana laye. Izihlenge uzaziphindisela ngemfanelo yazo.

19 Kusukela entshonalanga abantu bazalesaba ibizo likaJehova, njalo kusukela ekuphumeni kwelanga bazadumisa ubukhosi bakhe. Ngoba uzafika njengesikhukhula esifutheleneyo esifuqwa ngumoya kaJehova.

20 “Umhlengi uzafika eZiyoni, kwabakaJakhobe abavuma izono zabo,” kutsho uJehova.

21 “Mina lesi yiso isivumelwano sami labo,” kutsho uJehova. “Umoya wami okuwe, lamazwi ami engiwabeke emlonyeni wakho akuyikusuka emlonyeni wakho, kumbe emilonyeni yabantwabakho, loba emilonyeni yezizukulwane zabo kusukela ngalesisikhathi kuze kube nininini,” kutsho uJehova.